‘प्रहार’ चित्रपटाच्या विशेष प्रदर्शनातून कायदेशीर लढाई, भक्कम पुरावे आणि न्यायासाठीच्या चिकाटीचा संदेश
लोणावळा : दहशतवादाविरुद्धचा लढा केवळ शस्त्रांनी नव्हे, तर भक्कम पुरावे, सक्षम कायदेशीर प्रक्रिया आणि न्याय मिळविण्याच्या दुर्दम्य इच्छाशक्तीनेही जिंकता येतो, याचा प्रत्यय लोणावळ्यातील पोलीस अधिकारी व कर्मचाऱ्यांना आला. विशेष सरकारी वकील उज्ज्वल निकम यांच्या उपस्थितीत ‘प्रहार’ चित्रपटाच्या विशेष प्रदर्शनाचे आयोजन करण्यात आले होते. चित्रपटाच्या माध्यमातून न्यायालयीन संघर्षाचा थरार अनुभवतानाच उपस्थितांना कायदेशीर लढाईतील बारकावे जाणून घेण्याची संधी मिळाली.
लोणावळा उपविभागाच्या वतीने सिनेब्लिस थिएटरमध्ये आयोजित करण्यात आलेल्या या विशेष प्रदर्शनाला लोणावळा शहर, लोणावळा ग्रामीण, कामशेत आणि वडगाव पोलीस ठाण्यांतील अधिकारी व कर्मचारी, तसेच पोलीस प्रशिक्षण केंद्रातील प्रशिक्षणार्थी मोठ्या संख्येने उपस्थित होते.
‘प्रहार’ चित्रपटामध्ये २६/११ च्या मुंबई दहशतवादी हल्ल्यातील आरोपी अजमल कसाब याच्याविरुद्ध पुरावे सादर करून न्यायालयीन प्रक्रियेद्वारे शिक्षा मिळवून देण्यासाठी झालेल्या संघर्षाचे प्रभावी चित्रण करण्यात आले आहे. दहशतवादासारख्या गंभीर गुन्ह्यांमध्ये तपासातील अचूकता, पुराव्यांची विश्वासार्हता आणि न्यायालयात प्रभावीपणे बाजू मांडण्याचे महत्त्व या चित्रपटातून अधोरेखित होते.
कायदेशीर प्रक्रियेचे महत्त्व अधोरेखित
चित्रपटाच्या प्रदर्शनानंतर विशेष सरकारी वकील उज्ज्वल निकम यांनी उपस्थित पोलीस अधिकारी, कर्मचारी आणि प्रशिक्षणार्थींशी संवाद साधला. दहशतवादाविरुद्धच्या लढाईत कायदेशीर प्रक्रियेचे पालन, भक्कम पुराव्यांचे संकलन, तपासातील अचूकता आणि न्याय मिळविण्यासाठी आवश्यक असलेली चिकाटी याविषयी त्यांनी मार्गदर्शन केले. गुन्हेगाराला शिक्षा मिळवून देण्यासाठी तपास यंत्रणा आणि सरकारी पक्ष यांच्यातील समन्वय किती महत्त्वाचा असतो, याची जाणीव या संवादातून उपस्थितांना झाली.
चित्रपटात अभिनेता राजकुमार राव यांनी उज्ज्वल निकम यांची, तर अभिनेता ललित प्रभाकर यांनी अजमल कसाब यांची भूमिका साकारली आहे.
मान्यवरांची उपस्थिती
या कार्यक्रमाला पोलीस अधिकारी गजानन टोम्पे, भूषण माने, महेश विधाते, शंकर पाटील, आकाश पवार आणि मनोज पवार यांच्यासह अॅड. विजयराव पाळेकर, रेश्मा पाठारे, बिंद्रा गणात्रा, अनिश गणात्रा तसेच विविध क्षेत्रांतील मान्यवर, वकील आणि पत्रकार उपस्थित होते.
या विशेष प्रदर्शनामुळे पोलीस अधिकारी व कर्मचाऱ्यांना गुन्हे तपास, पुराव्यांचे महत्त्व आणि न्यायालयीन प्रक्रियेबाबत प्रेरणादायी अनुभव मिळाला. कायद्याच्या चौकटीत राहून सत्याच्या बाजूने ठामपणे उभे राहणे आणि न्यायव्यवस्थेवरील विश्वास दृढ करणे, हा या उपक्रमाचा महत्त्वपूर्ण संदेश ठरला.